بقلم
خيرى ناصف
الشعر خاننى وشاب
والوِش راح تجاعيد
وراح شبابى وساب
الصمت والتنهيد
و باقى عمرى عذاب
والوِحده وحْش عنيد
من بعد كُتر اصحاب
أيام ما كنت شديد
بقى ليلى غِيم و ضباب
ولافيهش شمعه تقيد
والعمر عَدى سراب
وجرحى ألمُه يزيد
يا خساره يا أحباب
سِيبتونى وحدى وحيد
لا حد دق الباب
ولا سلِّم سلام بالإيد
حتى اللى كانوا قُراب
راحوا وسافروا بعيد
يا ريتنى شعرى ماشاب
وفضِلت طفل وَليد
